Yelka bo‘g‘imi tuzilishiga ko‘ra oddiy bo‘g‘im hisoblanadi, chunki unda ikki suyak ishtirok etadi. Shakliga ko‘ra sharsimon bo‘g‘im turiga kiradi. Harakatiga ko‘ra esa ko‘p o‘qli bo‘g‘imdir, ya’ni uch o‘q atrofida harakatlana oladi. Bu bo‘g‘imda quyidagi harakatlar bajariladi: bukilish va yozilish, qo‘lni yon tomonga ko‘tarish va tushirish, ichkariga va tashqariga burish hamda aylana harakat. Harakat hajmi juda katta bo‘lgani sababli yelka bo‘g‘imi organizmdagi eng harakatchan bo‘g‘im hisoblanadi, shu bilan birga chiqish holatlari ham nisbatan ko‘p uchraydi.